港台員工剪片臭味相伴

【明報專訊】香港電台申請新大樓撥款觸礁，600幾個港台員工要繼續忍受老化嘅廣播道電視大樓工作環境。繼早前報道過有港台員工要喺走廊同貨櫃做嘢等，Emily噚日聽到有港台人呻，話喺電視大廈B1剪片室聞到臭氣熏天，擔心係「爆屎渠」，仲話幾年前都試過，唔係第一次。


Emily向港台查詢，收到機構傳訊及節目標準總監伍曼儀親自回覆，話噚日朝早有同事例行檢查發現B3層嘅污水泵老化，不能運作，已即時通知機電工程署，承辦商已喺一個鐘頭內更換污水泵。但有港台人話修理後問題只係暫緩，仲係一邊開工一邊聞到臭味，真係辛苦晒長期喺3層地牢B1至B3開工嘅港台員工，包括剪接、美術同資料室同事。


施永遠坐正 任助理處長

另外，曾喺訪問中指感到廣播處長鄧忍光要求他做政治任務嘅施永遠，噚日終於「坐正」，正式成為助理處長，追溯至今年4月16日生效。佢話日後工作性質無變，都係要睇電視部發展，包括增建發射站、發展App等。問施永遠有咩感受，佢話因為一路好忙，無乜時間諗，查實施永遠明年5月就會退休，阿施話會盡力做好！