丘文俊被冒認亂鬧人

【明報專訊】互聯網世界係咪好多人都唔用真實身分呢？新民主同盟沙田區議員丘文俊最近發現有網民冒認佢，去年9月開始以「丘文俊議員」之名喺網上論壇「香港討論區」發帖同留言，仲貼咗唔少佢嘅個人資料同生活照嚟包裝，事隔9個月，丘文俊經街坊投訴先發現事件。


開帳號欲澄清 惟不夠「經驗」

睇番「假丘文俊」嘅留言，佢試過自稱「沙田區議會G Dragon」同自誇靚仔，又喺巴士重組問題嘅帖子人身攻擊其他區議員，都幾影響丘文俊形象。丘文俊話自己一年上討論區唔到兩次，覺得成件事幾荒謬，仲令佢受到唔少困擾，因為有街坊錯信呢個係「真身」，質問丘文俊點解會咁講嘢。丘文俊為此特登開咗個帳號，點知唔夠「經驗」唔可以發信息，只好通知討論區管理員處理事件，仲考慮向警方備案。