許智峯民署靜坐又被抬走

【明報專訊】民主黨區議員許智峯早前喺中西區議會上被抬離會議室，噚日去民政總署辦公室玩「佔領」靜坐，話要求與署方高層會面，結果又被保安抬走。許智峯形容今次保安較佢之前「暴力3倍」，搞到佢電話熒光幕都爆埋，仲聲稱喺救護車暈咗10分鐘。民主黨噚晚發聲明，對署方安排保安粗暴驅趕要求開會人士，作出強烈譴責。


民主黨強烈譴責

民主黨早前去信民政總署，要求署方檢討區議會審批撥款機制及議事常規，許智峯唔滿意署方答覆，噚日同黨友吳兆康、區諾軒等去咗民政總署辦公室內發起靜坐抗爭，要署長陳甘美華回應訴求。署長唔睬佢，但派職員叫民主黨「寫信表達」，其後安排保安封鎖民政事務總署門口，最後只得許智峯同吳兆康成功進入辦公地方靜坐唔走。


手機屏幕爆咗 鞋都甩埋

許智峯話，一般市民去民政總署查詢同攞表格，都會進入佢哋靜坐嘅地方，質疑署方封鎖門口，而佢哋靜坐咗約半小時就有警員到場戒備，坐咗約4個鐘後，署方保安就開始抬走許、吳，二人掙扎，混亂間許智峯連鞋都畀保安整甩咗；至於警察今次就精咗，無再出手，只在旁觀察。