CY偕陳茂波練八段錦

【明報專訊】網上噚日熱傳特首梁振英（CY）、發展局長陳茂波疑似「跳舞」嘅相片，有人仲將佢哋同部分樂隊比較，十分搞笑，原來佢哋噚日去咗「建造業安全周2014」揭幕活動，聯同833名建造業從業員，一齊練習氣功八段錦，鼓勵工地人員注重工地安全，亦要注意健康體魄。噚日呢項活動，亦創下「最大型氣功教授班」嘅健力士世界紀錄。


偕833人創健力士

雖然CY耍八段錦感覺唔多協調，帶畀大家唔少歡樂，但相信佢都要繼續努力，皆因噚日中大亞太研究所公布嘅高官民望結果顯示，受訪者評梁振英嘅評分繼續唔及格，平均評分為46.1分，較4月份調查低1分。


CY最新評分46.1

今次嘅評分中位數係49分，而眾值就係50分。調查就顯示，有5.5％人畀梁振英0蛋，亦有2.5％畀100分。


至於對3個司長嘅評分，結果顯示，政務司長林鄭月娥表現評分為59.9分，財政司長曾俊華就有56.9分；律政司長袁國強就最低，有52.2分。亞太研究所話，特區政府、特首及3個司長與上次調查比較變化不大，持續平穩。調查喺本月20日至22日進行，訪問753名市民。