曾主席唔識副局梁敬國

【明報專訊】藝人黃曉明當年一句「而我不知道陳偉霆是誰」，令陳偉霆人氣大增，估唔到同一個故事，噚日喺立法會重演。事緣商務經濟及發展局副局長梁敬國，噚日代表政府列席立法會預算案辯論，聽議員發言，點知連主席曾鈺成都唔認得佢，仲誤會佢係來自環境局嘅官員，搞到梁敬國同主席都非常尷尬。


立法會拉布，噚日下晝復會，社民連梁國雄（長毛）就請曾鈺成問一問列席官員「係邊位」。曾鈺成好明顯唔認得，唯有翻查文件，點知噏極都噏唔出呢個官員究竟叫咩名。好彩長毛都唔介意，話「總之係官啦」。


處理積壓議案方式不變

呢個時候曾鈺成就請官員說明一吓自己係邊位，列席官員身分終於「水落石出」，梁敬國好尷尬咁讀出自己嘅職銜。其實梁敬國上任差唔多8個月，都無乜人認得，好彩有今次件事，先令佢有啲曝光機會，相信第日應該會多啲人識得佢。


另外，立法會內會噚日就傾點處理因為拉布而積壓嘅12個無約束力議案。民建聯建議維持現行每次大會傾兩個議員議案嘅安排，民主黨就提出每次開會可以辯論3個。長毛建議先傾有約束力議案，其他暑假返嚟開會傾。不過，一聽到暑假要開工，唔少人都耍手擰頭，建制派反對泛民同長毛建議，最終喺投票下維持現狀。