何俊賢開會 電腦見淘寶

【明報專訊】立會財政預算案宣讀時，民主黨何俊仁喺座位上用iPad睇性感水著相，令佢鬼咁尷尬，更被網民改名做「AV仁」，民望插水；當大家以為一眾議員都會汲取教訓，喺開會期間專心啲，其實人類真係會重複犯錯嘅，今次就輪到民建聯漁農界議員何俊賢，噚日佢就趁住答問大會期間，一路淘寶一路睇股票。


話淘寶戶口唔係佢嘅

唔知係咪何俊賢嫌答問大會好悶呢，佢用電腦開住淘寶網，去到購物車嗰版，唔知佢想買咩，要喺開會時間睇咁緊要，同一時間又用手提電話睇住股票。


認睇股票研辣招影響

何俊賢後來同Emily講淘寶戶口唔係佢嘅，佢只係打開電腦充電，無留意係乜嘢網站。但佢認有睇股票，話係想睇吓地產股股價，有無因為樓市辣招而有影響。佢仲話唔止關注漁農業，對其他行業都有興趣。


何俊賢斷正，唔知返到民建聯會唔會被人訓話，而該黨黨團召集人葉國謙話，議員開會時應做會議相關嘅事，並多聽其他議員發言。