畢加索作品 淘寶1蚊起拍

【明報專訊】家網上購物咁方便，連想買出名藝術家作品嘅人，都唔一定要去蘇富比或佳士得先有機會，上網㩒個掣就得喇。阿里巴巴嘅淘寶今日凌晨開始搞春季拍賣會，1元（人民幣）起拍畢加索嘅麻膠版畫《臉》，同埋同達利嘅青銅雕塑《時間的輪廓》，第一次有西洋經典藝術作品，喺淘寶上拍賣。


小琴一開頭都好懷疑，到底呢幾件係咪真迹先，但淘寶講到明，兩個作品都係由紐約嘅Galerie Michael畫廊提供，內地芳蘭壹品文化係賣家，絕無花假咁話。兩個大師嘅作品，肯定會吸引唔少人上網競投，所以雖然係1元起標，但咪以為會可以執平貨。皆因畢加索幅畫，每口叫價要5000元，而估值約120萬元，而達利嘅青銅雕塑，每口叫價3000元，估值45萬元。講開又講，上年馬雲喺個網度，都賣出咗幅自己畫嘅潑墨畫，就以242萬元成交，唔知上面兩位大師作品，會唔會平過馬雲嗰幅畫呢？


[小琴密語]