兩岸三地學運領袖聚首 之鋒勝利V手

【明報專訊】一早約咗八九學運領袖王丹（右二）食魚生嘅學民思潮召集人黃之鋒（左一），噚日終於去到台北同王丹會合，同場仲加送台灣反服貿學運領袖陳為廷（右一）同埋林飛帆（左二）。4個來自兩岸三地、帶領過3場橫跨25年嘅學生運動嘅領袖仲影咗幅合照，全場最後生嘅黃之鋒仲開心到擺出「港女自拍十式」之一嘅勝利手勢影相，張相震撼到連「幫港出聲」嘅facebook專頁都有轉載。唔知呢4位朋友第日有無機會喺香港或者內地再聚首一堂影大合照呢？


（網上圖片）