肥馬為政改 嫁女擺上枱

【明報專訊】人稱「肥馬」嘅前財經事務及庫務局長馬時亨一向關心政改，除咗不時接受傳媒訪問外，亦都曾經為政改3人組拍過政改宣傳短片。不過，估唔到肥馬除咗身體力行，仲將自己個女嘅婚事都「擺上枱」。肥馬喺新一輪政府宣傳政改短片中，就用個女嘅婚事來比喻特首普選。片中一對父母為個女嘅婚事點搞拗到面紅耳熱，肥馬就走出嚟做「和事老」，話自己上年嫁女，一對新人同雙方家長都會有好多意見，大家講到底都係想件事做好，所以最好平心靜氣傾掂，有商有量，「婚禮如期舉行，咁咪大家都開心」咁話。


有商有量 如期舉行大家開心

肥馬又提醒，人大常委會決定寫明，香港先要普選特首，然後至可以普選立法會，如果2017年不能落實普選，就會連立法會普選嘅機會都無埋，咁就真係好可惜嘞，仲笑笑口話﹕「2017年人人有份投票選特首，咁咪大家都開心囉！」