建制泛民騎呢招護官員

【明報專訊】社民連梁國雄（長毛）早前喺立法會會議向財爺曾俊華掟陰司紙，令立法會要討論係咪要增加保安同點樣保護官員。噚日行政管理委員會討論呢件事，Emily聽聞，會上唔少建制派都批評呢個行為，要求討論點樣加強保安。但民主派喺呢個議題唔多出聲，搞到民建聯黃定光開聲要求泛民表態。


有建制派引述，工黨何秀蘭提出，如果要保證官員安全，不如喺官員面前整一塊玻璃，咁就唔怕畀人掟到囉。


加設玻璃 絲帶圍欄

嘩，你估官員係安安同佳佳，要用玻璃箱隔開？建制派就唔多滿意呢個建議，覺得咁樣係變相縱容議員嘅離譜行為，提出反建議話係咪可以喺議員席前加絲帶等，造成「圍欄」作用，議員無咁容易衝去官員前。最終結論係﹕等秘書處研究先算。