入伙幾年 立會又傾擴建

【明報專訊】政改方案係咪會通過仍係未知之數，但大家都預料下屆立法會議席數目應該唔會再增加，不過，立法會行政管理委員會噚日討論擴建立法會問題。嘩，明明新大樓用咗兩三年，地方比舊大樓大咗好多，點解咁快又要傾擴建，唔通有議員收到風，政改方案會通過，議席亦會增加，預料地方唔夠用？


Emily聽聞，今次行管會傾擴建，係民主黨主席劉慧卿提出，噚日閉門會議上，有建築署人員解釋擴建方案，話工程可能需時3年。擴建並唔係起多一幢大樓，而係喺現有大樓上再加高幾層。


雖然會議廳設計可以容納最多120名議員，但若果日後要增加議員，辦公室會唔夠用。當年起大樓時已考慮到呢個問題，設計上有條件加高幾層。有議員就笑言，呢啲議程其實係「無米粥」，皆因擴建前提係要增加議席，目前睇唔到有呢個可能喎。