馮孝忠：乒乓好手 啱做交易員

【明報專訊】平時小琴見到恒生銀行（0011）環球銀行及資本市場業務主管馮孝忠，佢多數傾人民幣走勢之類嘅金融話題。噚日小琴去參加「恒生乒乓球學院」畢業典禮，馮生親自落場比賽，雖然係「嘀嘀仔」，不過佢好盡興，仲話打乒乓球可訓練反應快，如果同學仔退役，可以去做金融交易員。


有一位啱啱學打乒乓球無耐嘅同學仔，話自己以後要代表港隊走向世界，仲好長遠咁提到退役後要做教練。馮孝忠聽到就即刻為自己招兵買馬，話打乒乓球嘅人，好擅長迅速根據對手政策作出反應，退役後如果有興趣，可以進軍金融界喎。學打波仲幫搵埋工，如此宣傳，下年乒乓球學院報名人數會唔會激增呢？


至於馮孝忠場比賽，就頗有戲劇性。佢對陣學院嘅專業學生，開場「嘀嘀仔」不敵專業選手，馮生一度落後。不過主持人對呢位勁敵講「你究竟想唔想做金融交易員啊，想就醒目啲」，最終馮孝忠奮起直追，靠「嘀嘀仔」贏到比賽。


email: piano@mingpao.com

[小琴密語]