陳維安食齋 瘦咗又型咗

【明報專訊】立法會議員又展開漫長嘅拉布，噚日Emily同一班行家遇到立法會秘書長陳維安，梗係問佢會唔會好悶，佢話「聽會時好緊張㗎，要㩒鐘（召集議員投票），又要點人數」。立法會秘書處有6人輪流出席會議，每人每次聽兩三個鐘，但係陳維安當值完就要喺辦公室「留堂」，以防有流會等突發事情處理，所以成日都「朝八晚十」，好彩老婆同兩個仔都冇投拆。


Emily見到陳維安時，佢啱啱喺港鐵站買沙律卷做午餐，佢話已經夠食。話時話，陳維安真係fit咗好多，佢話食齋接近一年，「自然瘦」，減咗三四公斤，家得72公斤。見佢塊面尖咗、頭髮又gel得高咗，型仔過以前，有男記者都話心郁郁想轉食齋咁講。