大嚿何俊仁互罵無恥

【明報專訊】人民力量與民主黨不和已經去到互相指摘嘅地步，估唔到噚日連平時唔多發炮嘅民主黨何俊仁，都要同人力議員陳偉業開火，但導火線唔係政改，而係討論政府對社福機構嘅一筆過撥款問題。


陳：民主黨當年出賣社工

喺福利事務委員會會議上，「大嚿」陳偉業突然翻舊帳，話民主黨2000年時支持一筆過撥款，係出賣前線社工，形容民主黨係「無恥政黨」，又話當年如果民主黨無支持，呢項政策亦唔可以落實，又質疑點解呢個政策要喺社福界落實，但唔喺教育界落實云云。


何：陳攞完好處就走人

何俊仁隨即反駁，指出陳偉業2000年時仲係民主黨成員並參選，批評對方如果當時唔同意呢個政策，大可退黨，「應該走啦，唔應該攞我哋啲錢（參選）啦！」佢又炮轟對方「攞完好處就走人，最無恥係陳偉業」、「其實呢啲人淨係靠惡」。


陳偉業鬧完民主黨無恥，但聽到自己被鬧無恥，就要求主席張國柱裁決，但張國柱無處理，搞到陳偉業大鬧民主黨「奴才入中聯辦，出賣香港」、「未見過人咁卑鄙無恥」，然後離開會議室。