一堆一爐 政府借學者拉票

【明報專訊】環境局為「一堆一爐」向立法會申請撥款波折重重，上周三向工務小組闖關，遇上泛民議員發起小型拉布，除咗不停發問，又提出18項動議，結果要押後到聽日會議表決。噚日環境局喺政府新聞網，借科大土木及環境工程學系教授勞敏慈把口，話現代焚化爐排放較歐盟標準仲要低，唔會損害市民健康。


政府新聞網刊出專題，見到一班小學生參觀垃圾分類設施，個個見到咁多垃圾嘅模型都目瞪口呆。官網又訪問勞敏慈，佢係「倡議香港可持續廢物管理聯盟」成員之一，呢個會喺去年底成立，由50多名學者及多個專業團體組成。勞教授話，現代焚化爐採用「3T」技術控制污染物排放，即溫度（Temperature）、湍流（Turbulence）及時間（Time），焚化爐以850℃以上高溫及湍流，完全燃燒廢物，並確保廢氣喺爐內停留最少兩秒，以分解污染物。另外，焚化爐有多重設施清除塵埃、微粒、氮氧化物和二噁英等，確保排放氣體符歐盟標準。


立法會議員范國威就話，上周三工務小組會後佢再提出十幾項動議，合共32項，雖然拖得一時，但預料會議難再延續下去，所以會集中火力喺最後一關財務委員會發功，希望政府申請唔到撥款。