青民聯斥民調造馬 鄭宇碩：夠膽就查

【明報專訊】佔中5．6商討日投票引發民主派內部分裂，甚至連真普聯呢個運作咗超過一年嘅平台都有分裂危機，噚日港台節目《城市論壇》討論佔中3個方案都係公民提名，但席上嘉賓就無近日表明考慮退出真普聯嘅民主黨。主持謝志峰坦言，佢定題目時估唔到過幾日事態會咁峰迴路轉，所以之前無邀請民主黨黨員做嘉賓，並即場補鑊，多次問台下有無民主黨成員，希望畀番發言權佢哋。


城市論壇談佔中3方案 無請民主黨

噚日嘉賓一面倒係民主派人士，所以謝志峰都有畀台下建制派發言，其中青年民建聯成員陳廣錫就質疑，佔中投票結果同民調都係「造馬」，又呼籲真普聯召集人鄭宇碩解散真普聯喎。


民記公然挑機，鄭宇碩火都嚟埋，強調佢哋嘅民調等都好公正，如果民建聯唔滿意，應該另組平台，而民建聯夠膽嘅話，可以叫議員喺立法會度引用權力及特權法，調查吓究竟佢哋係咪造假喎，其他嘉賓聽到都忍唔住拍手。