十大人道新聞學生最關心劉進圖

【明報專訊】香港紅十字會噚日公布「中學生最關心的人道新聞選舉2014」，《明報》前總編輯劉進圖遇襲危殆以2839票，成為中學生最關心嘅人道新聞，躋身三甲新聞仲包括去年6月有俄羅斯少年斬人頭當波踢、去年4月嘅波士頓馬拉松爆炸事件，可見香港中學生都有國際視野。


Erwiana事件排第九

近5000個香港中學生喺3月至4月，以一人一票，由30宗人道新聞中選出佢哋關心兼具啟發嘅十大人道新聞。呢30則新聞從何而來？原來要先經紅十字會21名「人道新聞大使」將去年3月至今年2月嘅新聞「篩選」而出。今次投票選舉中，頭十名中有3項係本地新聞事件，除咗劉進圖事件，排第六位嘅係去年10月深水埗車禍女童過路遭小巴撞倒捲入車底，有7名途人合力將車推後救出女童。而印傭Erwiana受虐事件就排第九位。


「新聞大使」之一朱卓銳同學話，雖然同學好似較「關心」暴力新聞，但不等同於佢哋認同暴力行為，同學關注新聞只係反思係咪有更恰當方法處理問題。活動籌委會主席王振南話，希望活動有助年輕人擴闊視野、關心世界。