減宿舍開支 沈祖堯籲慳水電

【明報專訊】早排中文大學話出年要加宿費7.1%，搞到學生好唔滿意，覺得學校大把儲備，唔應該要學生畀。學生會先後發起簽名同靜坐抗議加價，最後校方見群情洶湧就一再讓步，將加幅減到4.5%。一輪風波之後，校長沈祖堯噚日喺網誌講佢對加宿費嘅睇法，又解釋大學儲備用喺邊，佢話好多都係來自有指定用途嘅捐獻，又有啲用嚟做固定基金賺利息，用喺每年學生獎學金同資助學生去交流呀咁，佢強調「我們沒有私心，總是將最好的留給書院的同學」。


承諾盈餘設宿費資助基金

沈校長亦再應承學生，會用部分盈餘成立宿費資助基金，包保同學唔會因經濟困難而住唔到宿舍。佢最後話，近年水電費係咁升，大家用水用電嘅時候可以都慳啲，減低宿舍開支，宿費就會再有得減下。