新聞類別
財經
詳情#
【明報專訊】近排唔少華資銀行賣盤，東亞銀行（0023）噚日開股東大會，一眾白髮蒼蒼嘅小股東就非常關心呢個話題。一位阿嬸搶到咪後好憂心咁同主席李國寶講，「其實如果有人搵你哋，我諗你哋都唔使即刻踢佢走，多少都傾下啦，賣唔賣隨你，傾吓都可以等股價升吓……」呢位小股東愈講愈激動，仲好幾次反問李國寶：「係唔係先？」最終李國寶打斷佢話，自己四十多年來「未有踢過客出門口，個個都同佢傾嘅」，說話未講完，成場股東都已經笑咗。
李國寶：個個都同佢傾
東亞都算香港一家比較開放嘅上市公司，股東大會對所有媒體開放，主席台上同樣白髮蒼蒼嘅李國寶，同其他管理層亦都對小股東幾尊重，開完會都繼續同股東傾偈，仲有人問李國寶年紀大咗會唔會安排繼承嘅事，當然李國寶就唔講呢啲啦。
email: piano@mingpao.com
[小琴密語]
留言 (0)
