入境處長係涂謹申師兄

【明報專訊】究竟入境處長陳國基與民主黨立法會議員涂謹申有乜關係呢？Emily估最多係涂議員係保安beat出身，所以同陳國基有工作關係啫，但連阿涂都估唔到，佢會喺一個母校活動見到處長喎。


教局副局長與涂同班

事緣係阿涂讀過嗰間小學中華基督教會基華小學（九龍塘）50周年校慶，請咗佢去感恩崇拜兼睇英語話劇，阿涂到場後睇場刊就見到嘉賓有陳國基個大名，原來陳國基係阿涂嘅師兄，1972年畢業，阿涂遲佢3年、1975年畢業，仲要大家都係讀下午班，不過當時大家真係唔識，反而教育局副局長楊潤雄就同阿涂同班。阿涂話，母校幾十年前喺彩虹邨，後來上下午校分拆兩間學校，一間留喺彩虹邨，另一間就搬咗去牛津道。