林卓廷減薪轉戰議會

【明報專訊】民主黨總幹事林卓廷近期常曝光，仲會「廉政行動」上身評論與廉潔有關嘅事。但Emily聞說，呢位白鴿黨大內總管近期遭減薪同「削權」，所以即刻搵「阿廷」了解吓發生咩事。


變兼職總幹事

阿廷就話，民主黨唔係無良僱主，而係因為佢嘅工作安排有啲變動，所以佢由全職總幹事改為「兼職」做嘅總幹事，因此人工減咗少少，但仍夠養家，叫Emily唔好誤會同擔心。阿廷有兩種身分，既係黨員又係職員，而佢近期花咗好多時間處理非職員工作，好似成日開記者會企出嚟評論湯顯明事件、去廉署舉報盛事基金，早排仲去參加絕食爭普選等。另一方面，民主黨早排資助佢喺上水開咗個辦事處，安排佢去北區打江山，佢每周去上水幾日做地區工作，兼顧總幹事嘅時間少咗，所以黨同佢傾過調整一下工作安排。


其實，民主黨係部署阿廷去上水選區議會，甚至立法會，而阿廷都好努力谷人氣。Emily就知道民主黨開咗個副總幹事職位，諗住分擔一下總幹事嘅工作。阿廷就話，家成日去上水街市門口擺檔，幫長者量吓血壓，解答公公婆婆嘅問題，工作都幾充實。