評曼聯炒領隊 學者政客變專家

【明報專訊】英超球隊曼聯噚日宣布炒咗領隊莫耶斯，全城曼迷及反曼迷都一陣熱議，facebook幾乎畀呢單「炒一男子」新聞洗板，政界及學術界都有好多球迷，連遠在日本名古屋嘅民主黨張文光（張文）都越洋同Emily講起呢件事，佢話對莫耶斯嘅忍耐已經到極限，又話對佢嘅離去已經唔係開心與否嘅問題，因為一諗起曼聯未來，有排都醫唔返，「更是傷神」。


張文：諗起就傷神

曼迷張文同Emily講，曼聯作為英超前一哥，竟然淪落到今年四大皆空無盃攞，破咗歷史上嘅輸波紀錄，「連對愛華頓主客全輸，對大部分相若強隊又輸，莫耶斯點樣可以繼續領導呢？」佢又話班主格拉沙家族抽水太多，唔肯出錢，只當曼聯係搖錢樹，令球隊老化，無強勁新人加入，話昔日費Sir費格遜領軍，仲可以調動球員贏波，但莫耶斯能力就見底，「莫耶斯加埋格拉沙，係死局」。


蔡子強：兩好一壞

學術界曼迷、中文大學政治與行政學系高級講師蔡子強，一講足球仲興奮過叫佢論政，佢用專家口脗分析，家曼聯話由球員傑斯做臨時領隊，有「兩好一壞」，佢話傑斯係球隊老大哥，可以服眾，加上係前領隊費格遜嘅愛徒，相信會有少少費爺真傳，但傑斯無咩執教經驗，可能輸蝕啲。


沈旭暉：令人興奮

國際關係學者沈旭暉都喺facebook分享莫耶斯被炒，仲話「原來一個人離開，真係可以咁令人興奮㗎」。