九龍社團聯會：唔怕親中立場嚇後生

【明報專訊】建制組織九龍社團聯會喺上屆立法會選舉力捧謝偉俊參選，原來佢哋最近已開始開班培訓年輕人做地區樁腳。聯會仲請咗全國港澳研究會會員嘅嶺南大學公共管治研究部主任李彭廣，同政治公關程介南開班教後生仔，Emily聽聞，本身係聯會副理事長、曾做過中聯辦官員嘅黃春平聽到李彭廣教書，上周亦去咗「sit堂」（旁聽），似乎呢啲培訓班吸引力都唔錯。


有社團聯會高層就同Emily講，普選臨近，聯會都知道直選愈來愈重要，所以要培訓多啲人才服務街坊。


再開班練地區樁腳

今次已經係九龍社團聯會第二次開班，每次大概會教十幾廿個後生仔，大部分本身都係聯會屬會嘅義工，小部分就係喺大學等地方招募。但係社團聯會打正「親中」旗號，怕唔怕嚇走年輕人？聯會高層就笑住同Emily講，嚟得嘅人都知社團聯會嘅立場，鍾意嚟就嚟，唔鍾意就可以走，唔需要隱瞞愛國立場咁話。