田少出卸膊相笑政府

【明報專訊】唔少立法會議員趁復活節假出埠充電，自由黨田北俊就去咗日本鹿兒島旅行，話要充電返立法會等泛民預算案拉布。田少即使旅行都不忘嘲諷吓香港時局，佢去行山見到一棵生歪咗嘅樹，就笑「政府就好似呢棵樹咁，乜都卸膊！」但係田少就無講明邊個卸膊，鬼馬嘅佢仲影咗張「卸膊相」上載facebook。


遊日見卸膊樹 話似政府

田北俊細佬、新民黨田北辰就去咗韓國首爾旅行，田二少話因為食得太多，睇怕返香港要多做運動。佢話去咗阿女嘅朋友介紹嘅韓式齋菜館食飯，本身麻麻地鍾意食齋菜嘅佢都大讚好食，食足兩個鐘先捨得走。


陳家洛曬細仔閃卡

有5個仔女嘅公民黨陳家洛就留喺屋企做「湊仔公」，話終於可以有4日假全天候陪屋企人，大呼「好幸福」，佢仲上載咗唔少細仔道明嘅「閃卡」去facebook同大家分享。至於民建聯陳恒鑌，噚日一家三口去迪欣湖野餐，發覺人山人海，停車場得幾個位，泊車極難，話要向政府部門反映吓！


特首辦未覆會否剷塗鴉

至於特首梁振英（CY），復活節就無放假，但唔知近日有無去銅鑼灣行街呢？因有朋友同Emily講，發現銅鑼灣港鐵站F1出口外嘅行人路上，有一幅CY頭像嘅塗鴉，仲挑機寫上「剷我啦」3個字，喺熙來攘往嘅街道上，相信每日都有好多人踩過。Emily問咗特首辦點睇，會唔會搵人清理吓，但佢哋就無覆。