動植物公園紅手狨猴等見你

【明報專訊】春回大地加上有4日復活節假，濕地公園同香港動植物公園分別舉辦特色活動。天水圍濕地公園目前有「繽紛濕地」主題展覽，介紹濕地嘅生物多樣性同生態系統，仲會為訪客安排一連串活動，如可到訪濕地保護區，體驗淡水沼澤、水池、蘆葦牀、泥灘等唔同濕地嘅特色。


濕地公園辦復活節親子遊

濕地公園今日起至下星期一（21號）仲會舉辦「復活節親子濕地遊」活動，有復活彩臉、彈跳藝術工作坊：桌上文具製作班、話劇《相約紅樹林》同吉祥物表演。


港島嘅香港動植物公園會舉辦「動物護理聚談」，由資深動物飼養員分享日常照顧靈長類動物嘅心得，以及動物保育工作情况。參與呢個活動嘅市民仲可以認識園內兩個新朋友——紅手狨猴，佢係攀爬高手，一身黑毛配以橙紅四肢，好cute。佢哋係來自德國嘅靈長類動物，2月先加入公園㗎咋，成為園內70多隻哺乳動物、280多頭雀鳥和30隻爬行類動物嘅新鄰居。「動物護理聚談」今明兩日上午10點同下午兩點舉行，費用全免。