純官「賭錢落海」 捐晒做慈善

【明報專訊】「純官」鄭家純响公益方面有顆「熾熱的心」，唔止加入扶貧委員會，原來家族公司周大福企業仲規定，所有投資賭場生意嘅收益都會捐去做慈善，純官話咁係因為搞賭「賺到嘅錢其實少少唔公義」，所以寧願捐咗佢喎，咦，彤叔同「賭王」何鴻燊係老友，純官又係澳博（0880）董事，唔知會唔會叫賭王捐埋一份呢？

噚日周大福珠寶（1929）慶祝成立85周年，純官今次主持完個慶典後，冇急急腳「逃走」，反而坐定定同記者食咗兩個鐘頭飯。


賭場收益扣除投資本金後捐出

話說純官家族近年積極進攻賭業，包括年初收購專做「疊碼仔」嘅太陽城集團，同埋競投澳洲賭牌。不過，純官話賭博令有啲人家破人亡，所以賭場收益扣番投資本金後，都會捐出去做慈善，佢仲話呢個方針已獲周大福企業董事局批准。


純官仲好錫周大福珠寶嘅員工，原來員工子女如果考上大學，學費同生活費都會由公司資助，呢招絕對有助加強員工歸屬感。


唔用微信whatsapp

除此之外，近年周大福珠寶狂攻網上銷售，純官勁buy電子商務，但佢原來冇用微信、whatsapp呢啲通訊軟件，「與其錄音畀人哋，點解唔直接打電話？打字？仲麻煩啦，我都唔識打字。」但佢用緊嘅都係智能手機，佢仲話因為唔熟科網行業，近年都冇投資科網股票喎。


email: piano@mingpao.com

[小琴密語]