余若薇雪糕 老公畀面

【明報專訊】公民黨噚晚舉行8周年晚宴，由於大部分立法會議員都已經出發去上海，所以出席嘅政界人士唔多，不過公民黨就特別請咗佢哋口中「不認命站出來」嘅代表，包括前商台主持李慧玲、免費電視牌照風波後「被辭職」嘅顧問伍珮瑩嚟捧場。


伍珮瑩下周勞審追薪「有壓力」

伍珮瑩噚晚帶埋大律師老公現身，佢話追討欠薪一事會喺下星期二上勞資審裁處，佢都覺得有壓力，呢個周末都要準備下，老公雖然唔可以陪佢去，但相信可以畀啲意見。


晚宴上唔識煮飯嘅公民黨主席余若薇表演整三色雪糕，佢話過程雖有用過化學物，但強調係跟國際標準而唔係國家質檢局標準，大家可以放心食用，畀錢食雪糕嘅包括佢老公胡醫生、民主黨何俊仁等。


羅范最早到 田少留低食埋飯

噚晚出席酒會嘅官唔多，有環境局長黃錦星同食物及衛生局長高永文，不過行政會議成員羅范椒芬就好畀面，6點已到場，成為第一個嘉賓。自由黨黨魁田北俊就好畀面留低食飯，係晚宴中唯一嘅建制派議員。