林鄭：2017做主婦

【明報專訊】每次政務司長林鄭月娥出席政改論壇，都有唔少參加者鍾意問佢會唔會參選下屆特首。林太噚日出席一個政改論壇時，就同大家講明唔會參選2017年特首選舉，佢話到時自己已經喺政府工作近37年，係時候「返屋企做番家庭主婦嘅功能」。


林太去咗「僑界社團聯會」政改座談會，有台下參加者問林太有無意願參加2017年特首選舉，仲大讚林太喺港人眼中形象好好，執政經驗同能力都好強。林太一聽就大笑話老公一早「落柯打」，同佢講如果有人問佢參唔參選，就唔該快啲答，林太好肯定咁話「唔會」參選，因為去到2017年佢就差唔多喺政府工作37年，佢話有機會服務市民係佢嘅榮譽同福氣，不過到時應該返屋企做番主婦啦。


今晚晤人力收對聯

雖然林太表明唔會參選，但佢的確好畀心機搞政改，因為林太連激進民主派人民力量都唔放過，今晚就會「深入虎穴」，同人力嘅執委見面講政改，人力立法會議員陳志全預告會送對聯畀林太，表達對政改嘅意見。