絕食10日 泛民運走高牆打氣

【明報專訊】泛民絕食爭普選四子工黨林祖明和郭紹傑、民主黨尹兆堅與胡志偉今日踏入第11日絕食，一眾泛民成員噚日中午去咗匯豐總行為四子打氣，而喺美國訪問嘅民主黨創黨主席李柱銘仲越洋致電支持佢哋。「驅蝗行動」召集人梁金成（金金大師）原本喺facebook發起「打邊爐爭普選」，「用暖火來溶（融）化泛民之間冰牆」，去匯豐踩場，不過噚日就以天雨關係「忍痛」取消活動。


打邊爐踩場活動取消

「打邊爐爭普選」爐火雖被天雨淋熄，但經歷過黑雨嘅四子，爭取普選嘅一團火就愈燒愈旺，四子今午會遊行去政總遞交爭取普選一人一信。噚日10多名泛民成員仲帶咗幾盒雞蛋同一塊石屎「高牆」為四子打氣，一齊用雞蛋砌成路軌運送高牆，象徵雞蛋眾志成城都可對抗、送走「高牆」。


尹兆堅話，連日都有親友叫四子唔好死頂，但自己絕食200小時後已去到「虛空」狀態，一啲都唔覺自己已絕食超過200小時；而佢黨友胡志偉前晚更一度進入「689」狀態，無多無少得番68.9公斤，好彩噚日朝早飲番杯水，體重即刻升至69.2公斤，脫離「689」狀態。