人權新聞獎 《明報》奪9獎

【明報專訊】《港芭風波》《良心犯》奪大獎

噚日公布嘅「第18屆人權新聞獎」，《明報》奪得9個獎項，包括中文新聞同特寫嘅大獎。已喺報業公會攞到獎嘅《香港芭蕾舞團涉自我審查風波》，喺人權獎中奪得中文新聞大獎，恭喜呢個報道兩名主力同事錢瑋琪及陸文。而明報偵查組亦憑《父活躍民運牽連被拘 十歲良心犯﹕不怕監控 怕爸被抓》得到中文特寫大獎。


明報攝影組就一口氣攞咗6個獎，其中攝記盧翊銘奪4獎，包括憑《城大清場迎特首》、《冒雨帶淚反直資》贏得兩個突發新聞圖片優異獎；而《媒體被綁架》及捕捉廣播處長鄧忍光嘅《門外漢》就為佢帶來兩個圖片特寫優異獎。攝記李澤彤喺舊年六四集會影嘅《雨來傘擋，守護燭光》同埋《天台上的天窗》，亦分別贏得突發新聞圖片優異獎及圖片特寫優異獎。


另外，特約作者譚蕙芸喺明報星期日生活副刊嘅《佔領中環對談系列》，就奪得中文特寫優異獎。


首次收內地傳媒作品

人權新聞獎係由外國記者會、記協同埋國際特赦組織合辦，今年收到破紀錄嘅474份作品，仲係第一次收到嚟自內地傳媒嘅作品，其中中央電視台國際新聞頻道/央視北美分台，就以《以生命換取經濟增長》贏得英文電視新聞報道優異獎