落區巴士留低邱誠武

【明報專訊】政務司長林鄭月娥噚日率領問責班子21名官員，浩浩蕩蕩落區宣傳《基本法》同政改，坐住一架紫色開篷巴士遊遍港島東，沿途大派「有商有量」嘅政改宣傳品。不過，可能人太多，連官場奶媽林鄭都走漏眼，途中留低咗運輸及房屋局副局長邱誠武。機警嘅邱武喺筲箕灣站宣傳隊伍「遺棄」之後，即刻轉身走入港鐵站，最後仲快過大隊去到宣傳嘅下一站——天后。


劉江華落區著競選戰衣

至於政制及內地事務局副局長劉江華，就著得好個人主義，全程披住印有「劉江華」三字嘅風褸，唔知係咪好懷念以前競選嗌咪嘅日子呢？

一眾官員雖係話應東區區議會邀請宣傳同慶祝《基本法》24歲生日，但活動就似為政改做勢多啲，林鄭月娥話，佢噚日只係應邀出席活動，其他問責班子成員就「好自動、主動」參與。不過，曾任基本法諮詢委員會秘書長嘅特首CY又點會忘記基本法「生日」？雖然無現身，但CY「好主動」咁喺網誌發表「基本法頒布24周年有感」。


絕食爭普選破韓連山紀錄

另一邊廂，一班泛民絕食爭取普選行動已經超過172小時，打破咗前年韓連山喺反國教科期間絕食171小時紀錄。民主黨林卓廷就喺醫護建議之下，噚晚7點停止絕食。其餘4人，包括民主黨胡志偉和尹兆堅、工黨林祖明同郭紹傑就繼續行動。