兩台續牌民間各出招

【明報專訊】噚日係通訊局就住無綫、亞視兩電視台續牌公眾諮詢嘅最後一日，截至噚日下午3點鐘，通訊局一共收到3700份意見書，外加「個別團體」提交嘅過千份問卷，同埋幾千份網上聯署信，通訊局話會平衡各方意見，再向特首同行會提交建議，到時一併公布諮詢結果。


亞洲會：九成撐亞視 獨媒：萬信反續牌

Emily估計，「個別團體」應該就係噚日到通訊局嘅亞洲會，亞洲會主席魏秋樺話透過宴會、私人場合同埋街訪，一共做咗1040份問卷，有93%受訪者認同香港要有良心媒體，仲有89%人贊成亞視係良心媒體，促請通訊局一定要為亞視續牌。


另一邊廂，當局所指嘅「幾千份聯署」相信就係獨立媒體發起嘅反亞視續牌、要求收回無綫部分頻譜嘅網上聯署，獨媒噚晚8點幾喺facebook公布，收集聯署信已經累積到9600封，相信喺噚晚12點諮詢截止前，好有機會達到目標嘅1萬封信。