高登巴打教維基合法入屋

【明報專訊】噚日愚人節，平日鍾意搞笑嘅一班高登仔就相當正經，網民「HKTV」同「高危階層」兩個巴打開帖為王維基（Ricky）獻計，度咗「香港電視入屋新一可行方案」，Emily睇過覺得幾有紋路，大致係建議港視研發一款內置天線嘅解密器，避開用大廈公共天線，咁就唔會觸及《廣播條例》同埋牌照規定。Emily八卦叫Ricky去睇吓方案可唔可行，Ricky話好感謝高登巴打又再發功幫忙，佢哋會認真研究方案。


倡加密港視信號 Ricky多謝再發功

網民「HKTV」噚日朝早開帖，寫明「維基巴打請入」，吸引到Emily注意。呢兩名高登仔唔止研讀咗好多條例，仲有細心構想圖，佢哋建議Ricky先將港視電視信號加密，令大廈公共天線收唔到信號，同步研發內置天線嘅流動解密器，只要用戶自購解碼器、再駁落電視，理論上一追台就可睇到港視。唔少高登巴打、絲打討論呢個方案，認為只要通訊局唔再「搬龍門」，應該行得通，只係擔心研發新解碼器需時。