城規會新莊「基金教父」加入

【明報專訊】現屆政府全力搵地起樓，城規會工作大增，成日要開會討論GIC地皮、綠化地是否適合改住宅。噚日政府公布新一年度城規會委員，有4名成員，包括馬錦華、陳漢雲、陳仲尼同李偉民，因為做夠6年要離開。但同樣做咗6年嘅城規會副主席黃遠輝（Stanley）就獲留任，繼續做副主席至2016年。


黃遠輝冧莊副主席

Stanley同Emily講笑咁話，原本佢都要退，但由於佢4年前擔任副主席，按政府規定，若委員擔任主席或副主席，任職年期要重新計數，所以佢繼續「冧莊」。Stanley話，搵人加入城規會唔易，雖然好多有心人想參與，但城規會工作量太大，每逢星期五開會，仲未計遇上多申訴意見嘅個案時加開嘅會議，搞到唔少人婉拒。


不過，亦有委員願意入城規會呢個熱廚房，今次政府搵咗5個新人，包括力撐梁振英參選特首嘅「基金教父」雷賢達。Stanley話，嚟緊城規會要面對新一輪工作，就係審視將海下、白腊、鎖羅盆3幅「不包括土地」納入郊野公園範圍，估計要面臨鄉事同環保團體嘅角力。8月就要審視新界東北，今年仲有排忙。