長毛去上海嫌使費貴

【明報專訊】民主派立法會議員仲未決定是否參與訪問上海之旅，噚日內委會繼續討論事件，向來激進嘅社民連主席梁國雄就表明佢會去上海，佢話雖然有好多細節未解決，但都「忍痛訂咗先」，慨嘆呢個兩日行程要成7800元。雖然呢啲開支係扣除議員出外考察嘅津貼，唔算係自己出錢，但長毛就話「對我呢啲窮人嚟講，係非常之昂貴」。


唔少激進泛民表明唔去上海，但長毛就話佢自己一定會「直斥其非」，仲話自己2005年「鬧完張德江」（時任廣東省委書記張德江05年會見全體立法會議員），仲話聽聞張「懷恨在心」咁講，佢希望張今次參與上海會面，「我再炳多佢一鑊」喎。不過，中央已經公布，同議員見面嘅係港澳辦主任王光亞等官員，恐怕長毛呢個願望會落空。


議員下周一前須回覆

立法會秘書處要求議員喺下周一前回覆是否參與，秘書長陳維安話，議員若遲過周一答覆，仍會安排，但因為要預訂機票，若果議員遲回覆，最終費用可能貴過預算嘅7800元，議員要補回差價。