高永文煮新創潮菜

【明報專訊】時下唔少學生一日三餐多肉少菜，為咗鼓勵市民培養多食蔬果習慣，衛生署噚日宣布第二年同海洋公園合作，將4月訂為「開心『果』月」，公園嘅餐廳月內會推出10款特別為活動而設嘅融合水果菜式，例如藍莓朱古力曲奇，就將藍莓同菠菜打成蓉再焗製曲奇，泰式豬肉漢堡入面就有士多啤梨同桃駁梨，其餘菜式就以果醬取代醬汁。


園內餐廳賣藍莓菠菜曲奇

食物及衛生局長高永文致辭時話，多食蔬果可降低患上大腸癌等癌症風險，但衛生署調查顯示，過半港人唔知每日要進食至少兩份水果，超過八成人每日食嘅蔬果都少過建議分量。高永文之後仲即場伙拍海洋公園主席盛智文下廚，煮咗道經佢改良嘅潮州菜「蜜柑釀蝦棗」，將柑粒混入蝦丸裏面，清蒸取代酥炸，用鮮榨橙汁做醬汁，親自示範煮出一道健康菜式。