高永文落台先敢去歐洲

【明報專訊】特首梁振英喺農曆新年休假時，去咗西班牙旅行，而食物及衛生局長高永文就話要等到「落台先去歐洲」。高永文話，自上任之來，無論出差定去旅行，都唔敢去好遠嘅地方，盡量揀啲可以幾個鐘頭內就可以返回香港嘅地點。因為佢怕萬一有咩事，都可以即刻回港主持大局。咁放假時咪唔可以同老婆去歐洲旅行囉？佢就話老婆都好體諒，唯有等到唔做局長時先去玩。


老婆體諒 家庭旅行去檳城

高永文話，上任以來去過最遠嘅地方就係去年5月往瑞士日內瓦，出席世衛會議，其他出訪都留喺亞洲。至於同家人去旅行都係採同一策略，捨遠取近，而對上一次同家人去玩係去馬來西亞檳城。高永文話，聽聞上一任局長周一嶽試過同太太去好遠地方旅行，點知香港突然發生事，結果要丟低老婆自己一個返香港先。