應耀康入房署「睇數」

【明報專訊】啱啱完成長策檢討嘅房屋署長栢志高（Duncan），做埋今個月就退休，下月2號起就由現任競爭事務委員會秘書長應耀康接任。有公務員同Emily講，話Duncan其實仲好後生，只係54歲，對佢咁早退休唔選擇留喺官場有啲驚訝。


Emily記得Duncan喺房委會開會時，好鍾意引用名人語句自勉；但佢上任時講過復建居屋需要7年時間，以及話要研究大學生申請公屋要設限等，都引嚟社會唔少爭議。而佢有份坐鎮嘅長策會，更傳出梁粉成員同佢唔啱key，話佢取態保守，令好多房屋政策落實唔到。但點都好，Emily衷心祝願Duncan退休後生活愉快。


至於接班人應耀康就喺1983年加入政府，2003年曾出任保安局常任秘書長，07年至12年出任財經事務及庫務局常秘，舊年6月借調競爭事務委員會，佢主力睇開財政，政府今次搵佢據聞都想佢幫手諗下房委會未來財政狀况點解決。