明報奪17新聞獎

【明報專訊】香港報業公會噚日派發「2013年香港最佳新聞獎」成績表，《明報》嘅同事一口氣奪得17個獎項，成為大贏家，仲創咗《明報》自1991年得獎紀錄以來嘅新高。今年攞咗4個冠軍，包括「最佳新聞報道」、「最佳經濟新聞報道」、「最佳新聞寫作」、新聞圖片組嘅「最佳圖片」，Emily恭喜晒一眾得獎同事，同時代表大家多謝讀者嘅支持同監察，《明報》仝人會繼續緊守崗位，做好每個報道！


偵查組兩報道各獲兩獎

明報偵查組繼續大豐收，「揭發前廉政專員湯顯明醜聞系列報道」取得「最佳新聞報道」冠軍、「最佳獨家新聞報道」季軍；「調查統計處問卷造假系列報道」則取得上述兩個組別的亞軍，而最佳獨家新聞就由《南華早報》有關斯諾登嘅報道奪得。


另外，一般新聞組、偵查組同地產組群策群力完成嘅「長實雍澄軒拆售風波系列」，就攞到「最佳經濟新聞報道」冠軍。一般新聞組同事冼韻姬、梁杏怡憑「SARS十年﹕謝婉雯捨身10年，兄嘆港人團結不再請記起無私抗疫的日子」拎到「最佳新聞寫作」冠軍。


除文字記者外，《明報》攝影組亦拎咗5個獎，其中攝記李澤彤舊年六四集會「守護燭光」相片拎咗新聞圖片組冠軍。Emily即時諗起當晚集會開始前突然落大雨，集會市民無因此離開，撐起雨遮守護六四燭光嘅難忘情景。《明報》唔少年輕同事都好努力，大學畢業就入《明報》，做咗兩年記者嘅港聞記者錢瑋琪憑 「研訊揭海處驗船四大漏洞」、「香港芭蕾舞團涉自我審查」等報道取得「最佳新人」亞軍。


編輯室噚日氣氛喜氣洋洋，有主管級嘅同事話，一個報道嘅成功有賴同事無分彼此合作，就好似攞到最佳新聞報道季軍嘅「港芭蕾舞團涉自我審查疑雲」，背後故事係採主發現後立即交畀負責即日新聞同事處理，專題組同偵查組隨後迅速支援搵料求證，先可以完成報道。主管仲多謝讀者一直以來嘅信任，向我哋報料，仲笑笑口話「你敢爆，我敢做！」筆桿，斬不斷。