天能有政策「撐腰」 低價搶市佔

【明報專訊】呢幾年中國經濟麻麻地，好多上市公司業績差，都不約而同怪「宏觀環境拖累」；但舊年盈利跌八成嘅動力電池生產商天能動力（0819），就不怨天尤人，反而非常自豪咁話，呢兩年嘅策略就係靠價格戰逼走小對手，而且有國策大力支持。


天能動力執行董事陳敏如話，舊年產品平均售價跌7%，減價促銷令天能喺動力電池市場嘅份額，一年間從27%升至35%。天能最大嘅競爭對手，係總部同在浙江長興嘅超威（0951）。超威1月底出過盈警，睇嚟兩大電池巨頭聯手打價格戰佔據市場了。陳又話，預計舊年兩間公司總市佔率超過七成，「如果今年下半年政策和市場需求穩定，會考慮提高售價，上市公司不提升利潤就是大罪」。逼走小對手，獨佔市場提高售價，對消費者唔係好事。但天能話今鋪有政策撐腰，2015年底前全國未通過環保檢查的鉛酸電池廠家都要被淘汰，所以天能超威減價踢走「唔環保」小廠家，都算符合國策喔。


[小琴密語]