內地客旅巴被指塞住大埔

【明報專訊】大家呢排好關注內地遊客來港嘅影響，噚日facebook群組「Tai Po大埔」就有網友投訴，話前晚有十幾架旅遊巴喺大埔超級城對開接載內地客，搞到塞車，部分遊客仲留低咗好多垃圾！有網上媒體話事件同超級城推出吸引旅行團嘅優惠有關，有街坊留言擔心大埔會「淪陷」，發起一人一信向大埔超級城投訴，亦有街坊發起今個月30號去商場抗議，要「光復大埔」咁話。


大埔超級城致歉檢討

當區區議員區鎮樺同Emily講，佢話間中都見到遊客喺嗰度上車，特別係假日同賽馬日，但未見過咁多旅遊巴。原來事發當晚佢6點半左右經過嗰度，見到好多架車分批接載內地團，每次3架，約共13架，同胞買咗好多嘢食，食住等車，到7點半先上晒車，其後行人路就留低好多發泡膠盒。佢之前已向商場提議安排遊客喺第二度上落，但商場未有安排。區議員話會跟進。


Emily向商場嘅管理公司新鴻基查詢，大埔超級城服務處回覆，話對旅遊巴造成大塞車，為居民帶嚟不便衷心致歉，會慎重檢討，已安排咗旅遊巴喺更合適位置上落客，同請人維持秩序同清潔地方。