考證颱風襲港相 網民出手贏專家

【明報專訊】鄭寶鴻丁新豹被考起

一個無名嘅颱風，喺1937年9月2日早上吹襲香港，引致風暴潮，席捲全港各區，造成1.1萬人死亡、逾千艘大小嘅船沉沒。天文台長岑智明噚日同傳媒聚會時，展示一張黑白照片，內容係1937年颱風襲港時情况，相中有一隻沉船，背景係維港。呢張相由本地收藏家張信剛（唔係城大前校長張信剛）喺網上投得，然後以投標價賣畀台長，無賺到佢錢。


天文台長儲相望警惕世人

為咗求證張相顯示嘅地點，台長趁收藏家協會聚會時，攞去畀多個猛人辨認，點知連殿堂級嘅鄭寶鴻、丁新豹都被考起。台長於是將照片上載到一個gwulo.com網站，有網民認出相中維港岸邊有間叫A.King嘅船廠，證實係昔日未填海嘅銅鑼灣避風塘。台長不時喺公開場合展示收藏品，佢其實係利用公餘時間，收集昔日颱風襲港嘅舊照片，日後如有機會出書，可填補歷史空隙，亦可以警惕世人，颱風襲港可以造成嚴重破壞，絕對不可以掉以輕心。