張志剛鍾庭耀同場論民調

【明報專訊】港台聯同港大民意研究計劃噚日搞咗個《眾言堂》節目，邀請市民同政界人士一齊討論政改。咁啱最近有份質疑港大民研嘅行政會議成員張志剛，同港大民研計劃總監鍾庭耀同場，兩人喺鏡頭前無咩交流，各自發言時則充滿「火藥味」。張志剛以「點心」比喻民調，話「蝦餃好食、燒賣好食，但我話叉燒包唔好食」，強調佢之前嘅言論只係針對個別調查做法。鍾庭耀就話，大家要文明討論民調方法，「唔好作文革式謾罵」。


張志剛喺節目上被市民質疑輸打贏要，話佢淨係讚賞合心意民調，排斥唔合心水嘅，張回應話，合乎標準嘅民調自己都會用，但若民調做法唔妥，就一定會指出問題所在。


鍾提「五不」討論原則

鍾庭耀之後提「五不」文明討論原則，包括對事不對人、不用語言暴力、不鼓勵議會暴力、不作文革式謾罵、不容許威脅人身安全。佢會後亦同記者講，話佔中可能牽動唔少人情緒，所以有人先會用放大鏡睇佢哋嘅調查。


港大校長徐立之表示，港大民研計劃嘅獨立性應由公眾判斷，而作為大學校長，就有責任保障大學學術及言論自由。佢話無直接接觸鍾庭耀，而學術界一向有唔少爭拗，唔認為今次學術自由受打壓，大家討論時最緊要唔好人身攻擊。