觀眾減4萬西九大戲棚吸客力弱

【明報專訊】為期近一個月嘅西九大戲棚上月9日曲終人散，西九表演藝術行政總監茹國烈（Louis）噚日總結今屆情况，由於戲曲中心正在動工，今年大戲棚搬到位置較偏遠嘅西九海濱長廊舉行。佢話，人流比上年約10萬人次有所回落，總參觀同入場人次減至逾6萬，不過仍然幾滿意成績。Louis透露，海濱長廊出年會興建公園，所以下屆大戲棚又要轉地方，但就離唔開尖沙嘴一帶。


下屆轉「舞台」地點

西九粵劇地標嘅戲曲中心預料2016年底落成，Louis話，現時仲未決定戲曲中心嘅建築物料，因為諗緊點樣可以再節省成本，所以家仲同緊承辦商傾，之後就會進入招標階段。大戲棚要喺戲曲中心舉行，最快都要2017年，換言之，未來兩屆都要另覓地點舉行。西九為咗履行為本地粵劇界傳承責任，Louis宣布，今年為大戲棚展演出嘅14個粵劇新星，將喺下年大戲棚擔正演出。噚日同場舉行西九粵劇新星頒獎禮，5個榮獲優秀表演獎係阮德鏘、阮德文、王志良、劉麗同黃寶萱。