新聞處一哥讀過神學

【明報專訊】政府新聞處長聶德權（Patrick）噚日喺政府新聞處（GIS）總部請傳媒朋友食咖喱餐，GIS上下全部出動，甚至特首辦、三位司長嘅新聞秘書都獲邀嚟食咖喱。唔講唔知，原來Patrick喺20幾年前讀過神學文憑課程，佢話自己係基督徒，覺得讀神學令佢學到好多嘢，家佢仲會喺facebook搞學習小組，同志同道合人士交流宗教哲學問題。


Emily問Patrick，香港呢個時勢，最好係讀《聖經》邊個章節，佢笑笑口咁話﹕「成本《聖經》啦！」唔係啩，咁大本？Patrick就話，做人又好、面對政改又好，最重要都係要有hope，有希望，大家咁至可以做落去嘛。


Patrick仲分享兩件小趣事，原來佢做社署署長時，曾陪過勞福局長落區，其間遇到記者，因為無新聞官在場，Patrick開咗自己iPhone嘅app嚟錄音，將記者問同局長答嘅內容send返政府做紀錄。另一次佢單拖出席研討會，諗唔到有兩個記者等候，問佢係咪調去GIS。佢叫人等一等，攞iPhone出嚟錄音，做埋新聞官嘅嘢，抵佢做GIS處長啦。