李偲嫣用蜜蜂反驅蝗

【明報專訊】「正義聯盟」噚日又有新搞作，召集人李偲嫣call記者去酒樓，宣布推出「蜜蜂行動」，抗衡最近嘅「驅蝗行動」、「拖篋行動」同「愛國愛黨大遊行」。佢哋行動有口號，叫做「精神文明小蜜蜂，香港價值在其中」。偲嫣姐姐話，「蝗蟲」兩字嚴重歧視，仲話喺舊約《聖經》，蝗蟲即係魔鬼，鬧人「蝗蟲」係好惡毒嘅。蜜蜂提走花蜜、散播花粉，希望內地遊客可以帶住香港文明花粉回國咁話。佢哋預備咗2萬個蜜蜂襟章同傳單，星期日會去尖沙嘴派發。


盼內地客帶港文明花粉回國

偲嫣姐姐又宣布成立「驅蝗行動事件關注組」，為近期受遊行影響嘅商戶提供法律意見，向遊行人士追討賠償，話已經有五六間商戶答應下星期一開會。驅蝗行動發起人梁金成話，唔知佢哋點追討，不作回應，但覺得李偲嫣嘅行動針對小市民，污染「正義」二字，要求她改名咁講。


發表完一輪偉論後，「正義聯盟」預備咗三大枱點心招呼Emily同行家，不過大家似乎唔多賞面，走夾唔唞。