鑽挖沙中線 出動穆桂英

【明報專訊】沙中線工程如火如荼，港鐵嚟緊6月尾就會開始用鑽挖機掘地道建隧道。噚日港鐵就向Emily展示沙中線7部鑽挖機中嘅大家姐「穆桂英」，原來港鐵有個傳統，所有鑽挖機都會用女性名字命名，另外6部就叫「楊玉環」、「織女」等，好盞鬼。


為咗減低對市民嘅影響，沙中線總共有5段隧道用地底鑽挖方式興建，會用到7部鑽挖機，係港鐵最高紀錄。鑽挖機能夠一邊鑽挖，一邊運走泥土，再將預制隧道組件放喺地道裏面，一日大約可以鑽幾米，每部造價逾億。


7部鑽挖機改女仔名

為咗幫呢7部機命名，港鐵特登搞咗個比賽，邀請全港中學生幫手命名，最後選出7個最合適嘅，不過都係古人或者神話故事嘅名，包括女媧、文成公主、鐵扇公主及雅典娜等，而唔係自創名字。港鐵人話畀Emily知，每個名都有些少意思，例如穆桂英係小說裏面嘅宋代抗金女將，反映鑽挖機無懼困難為大家鑽出隧道，而楊玉環就因為身形圓潤，同鑽挖機相似而採用嘅。


另外，穆桂英係近10年來港鐵第一部香港裝嵌嘅鑽挖機。港鐵話希望為香港工人帶來更多工作機會，所以將工序由內地轉到香港。穆桂英將會喺6月底開始由啟德鑽去鑽石山，唔知會唔會挖出鑽石呢？