邵善波否認有跳船潮 「有問責官任期過長」

【明報專訊】特首梁振英上場到家，已經有5個問責官員離職，喺北京接受傳媒訪問嘅中央政策組首席顧問邵善波就唔同意有「跳船潮」，仲話呢個概念「過時」，好似喺美國，政治任命官員任期平均唔夠3年，仲話香港唔少問責官員任期係「過分長」同「過分穩定」，「有啲局長做了幾多年？十年八年都有」。咦？喺家問責團隊裏面，做咗10年嘅問責官員，就只有財爺曾俊華。唔知邵善波咁講有無特別意思呢？


問責官僅財爺做咗10年

Emily特登翻查一下喺2002年問責制推出之後，邊個問責官員在位最長，原來連埋轉過問責嘅崗位，曾俊華就係任期最長嘅唯一一個。曾俊華喺2003至2006年先做工商及科技局長，到2007年一直做財爺，經歷3屆特首，「總任期」差唔多有10年咁多。其次已經係做咗7年嘅政務司長林鄭月娥、民政事務局長曾德成、財經事務及庫務局長陳家強，同勞福局長張建宗。


中大政治與行政學系高級導師蔡子強就話，照咁睇邵善波嘅矛頭明顯係指向曾俊華。「梁粉」過去多次已公開炮轟曾俊華為「守財奴」，又藉輿論陣地「港人講地」不斷炮轟對方，但曾俊華之所以「任期長」，明顯係中央較滿意佢嘅表現，希望本港財金穩定，有重量級人物在位，亦突顯曾俊華過渡到「梁班子」並非梁振英嘅願望。不過，蔡子強就笑住話，如果有人咁想畀說話財爺聽，係好蠢嘅做法，最終只會枉作小人！據Emily了解，財政司長辦公室對邵善波嘅說話並無特別關注，亦都無咩人留意到。