尖沙咀街坊會「進駐」浸大

【明報專訊】Emily噚日有朋友到過浸會大學，見到「舊校」善衡校園一個俗稱「玻璃房」嘅活動中心（OEE603）冠名做「尖沙咀街坊會活動中心」，仲有工人掛緊啲字到牆上。繼之前「裕華國貨演講廳」後，又一個冠名引起學生同校友討論。有舊生喺facebook見到幅相，覺得個名「好屋邨」，仲有舊生講笑咁話，「唔知第時會唔會有『愛港之聲自修室』之類出現？」


Emily就此問過浸大，佢哋話尖沙咀街坊福利會舊年捐咗300萬港元支持浸會大學長期發展，浸大為咗多謝佢哋支持，決定將其中一個活動中心命名為尖沙咀街坊福利會活動中心。查實浸大同呢個會關係好密切，浸大持續教育學院喺尖沙咀街坊福利會大樓設有教育中心，而浸大中醫藥學院亦喺大樓開咗中醫診所。浸大舊年亦頒咗榮譽院士畀該會理事長蘇仲平，亦曾向政府建議，可以喺尖沙咀街坊會地段合作自資興建中醫院。