新聞類別
港聞
詳情#
【明報專訊】終審法院前首席法官李國能2010年退休之後，原來一直都有個心願，就係為佢3套法庭服飾搵返個「屋企」。李官話，呢3套法庭服飾見證住佢過去13年法官、24年大律師嘅生涯，佢對服飾感情深厚，法庭服飾唔單止有助確立法院同司法程序嘅尊嚴，同持亦提醒法官同律師要謹記專業同責任，可惜無一個香港展覽場地接收李官嘅法官袍，好彩李官最後遇上港大法律學院院長陳文敏。
同陳文敏一拍即合
港大法律學院喺百周年校園鄭裕彤教學樓7樓搞展覽，介紹香港司法制度，噚日正式開幕。陳文敏話，佢一直都覺得要成立博物館推廣司法教育，幾年前仲向港府建議喺終院搬返中環立法會舊大樓後，將現時嘅炮台里大樓改建成博物館，但政府唔接受，最後唯有自己搞，點知原來李官都有意捐出當年嘅大律師袍、律師袍同法官袍，可謂一拍即合。
包致金：捐袍未必有人要
法律學院嘅展覽仲包括過往法律年度開啟典禮嘅舊相，仲有介紹詳細介紹不同法庭服飾嘅分別。不過，李官捐出嘅3套衫就唔包括喺公開展覽部分，大家要睇就需要預約﹗Emily噚日問終審法院非常任法官包致金，第日退休又會唔會捐衫，包致金就話，即使佢肯捐袍都未必有人要，仲話如果Emily有機會見下佢件袍，就會明白……
留言 (0)
